"CHEINA AMAGI CHEITHENG"

Ineton Tampha,
lamdamsigi yumgi mousingda
mashana yaningdrabasu
nam-haduna thinjinbiriba
amuba chandan adu
nangisu sharuk thunghanbiraba?

Angang oiringei
ima bajigi tung-induna
hek hek chatkhiba
ningshingbana ngasisu
marak-marakta pubiriba
nungshiraba chingyagi khungang adugi
khalei loubukta
potpu langol loukhao thangolga
marup oijaduna
punshi shintha pangjaramba
eigi mamma Angousanabu
aain ngakpagi mingda
aain khonggaonariba
mamei pandaba keishalsingna
sharak tambikhraba?

'Ibem, nang mammadiko
chak thongbasi tankhidraba
chakhum hekta changkhini
mathel lukkoi
mana thokpa langkhini'.
Ineton,
nangna nongma haikhiba
eina ngakna noklaga takhiba
waheisingsina
hanjin hanjin yeirare
ngasi eigi nappada.

Chatnabiga yemmounarabasu
Ineton,
nangbu khankhide eina
shuningdabi,nupabu khudonbida leibi
loukhide mammabusu
nupina ngamba adhamora
kayada ingna chikna panminnakhiba
nakhoigi yumbal punshi
malom amatta thamnada
angam angamba tengbangminna.

Ineton,
nangi lairik heibi namouse
nangna chaothokchakhibagi
wahanthok amatta leihanda
hostelgi kasida
khabargi mayek unaba
pirang teithokpa laknabana
ithou oiri.
nasham nana ifa fa
tengtha naoibagi khonjel ishi shi
meerelshangi mapalda
chada-thaktabagi
hamchat hamfoinana lep
nangna paumeesingda tamlamgadaba
penda paodamsingdu
uri eigi wakhalgi meetta.

Ineton,
eigi sheirengsingga kapminnabagi
cheina faoringei thamoisi
nahakki cheina cheitheng
amuk fangjabasida chignarakle
thamoisi mayi chatkhragadra?

Pagadabana marol ama
igadabana kongai ama
loiba naidraba shatragi punshina
bandigum fajin fajinna
Ineton,
wakhalgi mangla hanglaknaba marakta
shungli sheireng
nahak amadi mammagidamak
masi mangaire ayambi namouna
nakhoigidamak toujaba ngamba.
....................................................